當年今日
關於我們

台灣飛人 - 左丁山

蘋果日報 2003/10/03 00:00


台灣來客與食家C到陸羽飲早茶,急call左丁山,於是欣然赴會,有食家C在,包有好嘢食,何況陸羽乎?
台灣客乃係香港人,近年卜居台灣做生意,於是乎聲音兩邊走,如神龍見首不見尾,分分鐘會在中環出現,失驚無神就捉埋左丁山去食飯,大概佢一個人在台北冇乜好食,所以返到香港就要去吓陸羽、鏞記、福臨門之類。
台灣來客嘅太太赫然在座,重以為佢兩公婆返嚟慶祝國慶,歡渡黃金一週㖭。來客話:「非也,非也,老婆一早就返咗嚟,唔肯再過去,因為佢唔慣台灣生活……」太太插嘴話:「唔,嗰邊大男人主義太嚴重,細路讀書又唔慣……」
騎騎,男人去台灣過活就幾爽,香港長大嘅女士,曾留學歐洲嘅,多數唔習慣台灣式,故此台灣來客太太就情願返嚟香港,叫老公做台港飛人,兩地相差只係個零鐘頭飛機,冇所謂之至。
左丁山曾問過另一位長期居於台灣嘅香港老友,問佢台北學校如何,佢話:「傳統名校建國高中、北一女就係當地嘅叻仔叻女讀嘅;外國人就讀國際學校。台灣人亦有入讀,呢度嘅唔好處就係過份崇洋,尤其崇美,鬼子佬俾當地人縱壞晒,零舍高人一等。我哋啲仔女喺國際學校就係唔順氣呢樣。」咁講法,唔怪得台灣來客嘅太太情願攜同細路回港,佢見慣世面,點會容忍細路喺學校俾人歧視噃。