恭喜！恭喜！蔣怡（Coco）早前宣佈與珠寶設計師翁狄森（Dickson）再度成功造人，繼長女Uma後再陀B，仲陀正個仔，一仔一女湊女「好」字，喺今年4月，CoCo出席公開活動時，仲預告B仔預產期係6月中至尾，預計剖腹生（新聞連結： https://bit.ly/2tgkMjs ）。

點知人算不如天算，原來B仔喺上月30日提早報到！CoCo囝囝重約5.3磅，母子平安，o依家佢兩母子已經出院返咗屋企啦！據講，今次生第二胎都好突然，因為佢係同老公約咗班朋友喺街食飯，當中有朋友講笑：「你個仔可能今晚就出世！」佢哋兩公婆當時都冇為意，點知Coco返到屋企後一直瞓唔着，突然覺得下身有水份滲出，佢即刻叫醒個老公送佢入醫院。上次開刀生第一胎，佢哋兩公婆都提前到醫院做晒準備，但今次提早作動，佢哋係完全冇準備，真係殺佢哋一個措手不及，Dickson只好漏夜趕緊送老婆入院檢查，出門前Coco都錫咗熟睡中女兒Uma一啖，等佢起身時唔見到媽咪同爹哋都唔使怕怕。

Coco今日話當晚去醫院途中，流出嘅水量開始變多，仲帶有血水，好彩老公Dickson夠醒目，出門時攞咗條大毛巾包住佢下身，車到佢達醫院時，羊水已經穿咗，真係隨時生得，Coco痛到飛起，醫護人員即刻推佢入手術室開刀，個手術室啲冷氣好凍，Coco話當時係又痛又凍，全身打晒震，心裏面又擔心早產個B唔知有冇事，好彩手術順利，母子平安。

Coco上次大肚有影寫真，今次生第二胎一樣有影，今日連埋囝囝嘅相一齊公開，佢講：「上次就是要拍攝很簡單、黑白全裸的寫真。這次我想挑戰一下自己，大肚寫真的概念主要是紀錄懷孕時的曲線美態和身體的變化，而且我和Dickson一直都很喜歡原始和大自然的感覺，所以我們和攝影師Simon C溝通過後，便選擇了走出户外，向海灘和樹林進發！在討論造型和道具時，因為想呈現最原始最野性的美感，而且認識一位爬蟲類專家Toni，便誠邀請他提供各種類精彩的動物，讓拍攝效果更加美滿！」

原本Coco係打算4月份影嘅，可惜各方面嘅時間配合唔到，最終拖到5月先影得，到影相嗰日正係5月最熱嗰日，由於唔想個大肚婆咁辛苦，就唯有選擇上晝去海灘影，下晝就喺攝影棚再影，Coco話：「拍攝當日，Dickson都一直陪伴着！心裏都自覺十分大膽有走出大自然這個概念，而且還需要擔心各方面能否配合，如海灘環境、泳客、各種動物和自己身體狀況等等，還好拍攝過程都很順利！」

對於選擇同唔同種類嘅動物合作拍攝，Coco話一向都喜歡各式各樣嘅動物，無論係貓、狗，還係蛇、蜘蛛或蜥蜴等！而且大肚嘅體態、精彩動物都是係靚嘅標誌，都係大自然嘅一部分，希望透過相片可以傳遞俾大家，要珍惜大自然嘅資產，同埋識得重視每個生命等訊息！

精選娛聞，喺晒《娛果》
http://fb.com/appledailyent