達明一派噚晚喺油麻地舉行《達明卅一派對-放映及分享會》，吸引不少Fans捧場，今次係兩人首次喺戲院放映演唱會影片，片段係將三場演唱會剪輯而成，當黄耀明知道拍檔劉以達未睇過時，就苦笑話:「我自己剪完之後都好厭倦唔想再睇，因為剪咗好耐，好多個月。」不過明哥表示無後悔負責剪片。

上個月達明喺美國開咗巡迴演唱會，但只能變成縮水版，因為香港樂手同舞蹈員規模太大，冇可能總動員去，問到幾時再開騷？明哥話:「等公司安排，再做都係做番呢個先，因為做一個新要諗好耐。」達哥指佢哋都寫咗好多新歌，計劃出碟。

聖誕節兩人都會放假慶祝，達哥聖誕後會幫一個慈善團體狗場拍片，更會首次同狗做對手戲，佢話:「嗰場有成百隻狗，我揀咗一隻，都有入去餵吓佢培養吓感情，都聽我話。」

更多娛聞，喺晒《娛果》
http://fb.com/appledailyent