收到幾封讀者電郵，一位盧先生話某報作者喺六月二日對「貴報《蘋果》副刊作者極為侮辱……請你說幾句公道話。」左丁山冇睇過嗰篇專欄，無以置評。爬格子動物各有不同風格，即使為出位、為搵食，都唔需要踩另一位動物！
讀者鄧先生話Wedochickenright可以譯做「做雞餐，我最盞」；另一位蘇先生建議譯為「我哋炸雞最正」或者係「炸雞我哋最正」！左丁山好耐冇去過KFC幫襯咯，唔知佢係唔係獨沽一味賣炸雞（聽餐廳羅講，KFC有英皇雞飯賣），如果係嘅話，「炸雞我最盞」最為貼切。

關於「英皇雞飯」（chickenalaKing）其實即係白汁燴雞飯。係好道地嘅香港西餐，最貴嗰碟，在Jimmy'sKitchen有售，茶餐廳嗰碟，自然冇咁靚，《蘋果》讀者常識豐富，各位可唔可以教吓左丁山，呢個名稱究竟來自何方神聖？邊位天才發明㗎？
一位讀者Windy話：「拜讀仿林振強談幾米，不敢苟同」。Windy認為古典音樂精采異常，最普遍嘅貝多芬《命運交響曲》、Vivaldi《四季》、莫扎特作品，簡直是上帝之作，JohnWilliams嘅《星球大戰》、《ET》亦是交響樂。至於幾米，亦值得領會，難道名采版咁大，容不下一個幾米？左丁山唔係咁嘅意思，《蘋果》當然有空間容納「幾米」，亦會有讀者喜歡，只係我重未睇得明啫。至於古典音樂咯喎，左丁山悠閒之時，就聽《四季》；壓力太大時，就聽《命運》、《英雄》，或者《田園交響曲》，一啲都冇隔膜。