容祖兒、謝霆鋒晏畫喺赤柱出席慈善競跑活動。因為何韻詩出櫃，令Joey畀人質疑係雙性戀，佢受訪英皇大包圍派出九名工作人員護航，Mani更加一直坐喺Joey身邊，mark到實，驚佢講嘢；反而一班fans拉起寫住支持Joey嘅彩虹旗，而彩虹旗又係同志平權嘅象徵，莫非fans想表達無論Joey點樣都會撐佢？

訪問期間，Joey一講起「性向」呢件事就表情繃緊。對於雙性戀，佢就解釋呢行好多人對佢有誤解，又主動提起阿詩：「阿詩表達自己取向，作為朋友絕對支持，如果畀我有呢個機會我會支持，大家永遠係朋友，君子之交唔使講到明，大家心知。」

祖兒同師兄劉浩龍0岩0岩去完旅行，今次拍拖度假，感情一定有增無減啦?祖兒聽到呢句，個表情先寬容0的，不過就封口唔回應。霆鋒0係身邊插咀話：「乜年代呀?兩個人單身一齊開心就得，唔通好似我冇人冇物咩！」