【真心欣賞】楊瑞麟司儀比賽攞冠軍：好怕人哋話我贏咗黃子華
蘋果日報 2019/10/24 06:01
黃子華楊瑞麟
攝影：沈健程（右）- 楊瑞麟直言：「我好怕話人哋話我贏咗黃子華！」
- 楊瑞麟：「比賽只不過係遊戲，遊戲一定係有輸贏，係好隨便嘅一件事。」
- 楊瑞麟十分欣賞黃子華： 「佢付出咗咁多嘢，相比之下我真係付出好少。」
- 楊瑞麟笑言：「我嘅企圖心唔強，有飯食已經好安落。」
- 楊瑞麟說：「仲有空間俾我去進步，繼續向前行，滿足我呢個興趣。」
現年57歲的資深藝人楊瑞麟，早前宣佈離開無綫，結束32年的合作關係。楊瑞麟在1987年參加《全能司儀比賽》，撼贏黃子華而奪得冠軍後加入TVB，當離巢消息曝光，隨即有網民翻查資料而重新關注此事，日前楊瑞麟在尖沙嘴接受《蘋果》專訪，對於當年在比賽上贏過黃子華，他說：「我好怕話人哋話我贏咗黃子華，千祈唔好用個『贏』字，我成日覺得呢個比賽只不過係遊戲，遊戲一定係有輸贏，係好隨便嘅一件事，只不過嗰陣係喺一個特定時間贏咗佢啫，而且遊戲係有好多主觀，未必真係贏。佢付出咗咁多嘢，相比之下我真係付出好少，工作嚟到我係好勤力去做，但係佢係好主觀去創作啲嘢，呢樣嘢真係好難，大家付出嘅努力冇得比，我真心恭喜同欣賞佢。」
之不過當年他被安排做司儀工作，例如《歡樂今宵》、《大江南北》、《香港早晨》及《都市閒情》等工作，一度被指名為金牌司儀接班人，問到他會否覺得流失了機會？他說：「睇番呢啲過往嘅歷史資料，似乎係有啲影響，但係如果我捕捉晒呢啲嘢，亦未必有更加多，所以算喇，最終都接受當初嘅狀態。」他還説：「我嘅企圖心唔強，有飯食已經好安落，喺頭嗰10年覺得做主持OK，久唔久客串拍吓劇，直到喺呢10年間突然好鍾意拍劇，好鍾意演藝呢個藝術，體會深咗，原來呢啲先叫做戲，本來係零分，到而家嘅40零分，仲有空間畀我去進步，繼續向前行，滿足我呢個興趣。」
撰文：唐琛悠
場地提供：鉄板焼海賀(The ONE)
場地提供：鉄板焼海賀(The ONE)