陳冠希淫照事件爆發之後，女主角嘅鍾欣桐（阿嬌）曾經同好姊妹蔡卓妍（阿Sa）以Twins身份喺河北幫品牌運動服宣傳，不過之後兩人就各自分開發展。事隔半年，噚日中秋節，Twins團圓同台演出，阿嬌同阿sa一齊喺成都做中秋晚會表演。

阿Sa前晚喺將軍澳電視廣播城演出，問到佢中秋佳節冇得同好朋友鄭中基慶祝，會唔會唔開心？阿Sa笑說：「同阿嬌人月團圓一樣開心，而且去四川探訪，咪仲有意義。」佢噚日就坐早機出發去成都，會合已經到咗當地嘅阿嬌，一齊演出。
至於阿嬌前日同鄭希怡（Yumiko）、李逸朗及吳雨等率先去咗內地，佢哋去咗四川擂鼓鎮，探訪一個喺地震中十名親友死剩一個孫女嘅災民沙婆婆，生活困苦嘅沙婆婆仲送咗花生畀佢哋做禮物。眾人之後又去咗學校同學生歡聚、打排球，阿嬌同Yumiko仲做埋攝影師，為唔同嘅受災家庭影合照。