今年出道12年嘅韓國男團Super Junior(SJ)，待成員銀赫、東海及始源退伍後，將於10月推出新碟回歸樂壇。不過隊中唯一人夫晟敏就畀粉絲抵制，SJ其中一個韓國粉絲後援會「DCInside Super Junior Gallery」(SJ Gallery)噚晚發聲明要求晟敏退團，並以紅底白字寫住「SUNGMIN OUT」嘅字眼，引起其他粉絲熱烈討論。

晟敏於2014年9月公開與音樂劇演員金思垠嘅戀情，並於同年12月成婚。由於爆出拍拖一事太突然，當時有唔少粉絲到晟敏嘅Blog留言希望晟敏作出回應，不過晟敏就多次無視粉絲，甚至將「韓國粉絲」設為禁語，又用粉絲對自己嘅暱稱「MIMI」稱呼太太金思垠，令粉絲大感失望、心淡。

SJ Gallery聲明中表示：「由於晟敏一直以嚟無視粉絲嘅種種行為，並帶畀SJ無數嘅打擊，因此我哋認為晟敏唔應該再以SJ嘅成員身份持續宣傳活動。」不過聲明中就強調「要求晟敏退團只係SJ Gallery嘅立場，我哋會尊重SJ嘅選擇，唔會強迫SJ接受，及後會繼續支持強仁及晟敏以外嘅SJ活動」。對此，SJ方面未有任何回覆或聲明。