現年26歲嘅韓國女星李侑菲，前年夥拍男星李準基拍攝劇集《夜行書生》並首度擔任女主角，雖然當時佢只係出道短短4年，但演技已經備受讚賞，並於《2015 MBC演技大賞》獲頒「迷你劇部門女子新人賞」。不過前年10月因遺失手機被勒索，其後更有不少網民於李侑菲嘅Instagram留下惡評及散佈流言，令佢不堪其擾，更一度刪除Ig帳號。

未知係咪因為經歷呢啲事令李侑菲受到打擊，佢喺2016年休息期間已經甚少公開露面，佢噚晚更係Ig上貼一篇長文章，坦白自己過去一年經歷低潮並剖白自己嘅心境。李侑菲首先引用小說嘅其中一段文章：「真係好想做得好，但因意想不到嘅事令身心都受傷，就連自己都唔信任自己。」

李侑菲又表示：「過去一年嘅低潮期中，一直唔想露面，想就咁匿埋。唔使遵照世界嘅標準，只需為自己嘅人生而努力，我哋只要盡力就唔會後悔，我努力克服中，明年將努力工作。」表示自己將從低潮期中走出嚟，獲唔少粉絲留言為佢打氣。

其後李侑菲似乎想安慰粉絲，上載一張自己變成貓嘅得意自拍照。