新星輩出嘅法甲球隊摩納哥，喺周三歐聯4強首回合主場0:2不敵祖雲達斯，神奇之旅似乎走到尾聲。面對經驗老到嘅「斑馬兵團」，部份新星顯然未能踢出水準，包括俾戴巴拿拍甩腳下球間接導致失第二球、盛傳備受英超豪門垂青嘅22歲中場泰莫爾巴卡約高，現時擔任評述員嘅前曼聯名將里奧費迪南直言佢未係時候登陸英超：「我唔知佢預備好前進一大步未，但就選擇傳球對象同認清危險方面，佢顯然有好多缺失。」

至於被譽為「新亨利」嘅18歲前鋒基利安麥巴比，賽前拖住客串球僮嘅細佬出場，上半場一頭一腳埋門相當具威脅，雖然下半場表現同樣轉趨沉寂，但整體發揮尚算唔錯。佢賽後坦言摩納哥輸經驗：「我哋唔夠經驗，而且唔夠冷靜，因為我哋的確創造咗唔少入波機會，只係未能轉化成入球。另一邊廂，祖雲達斯有兩個明顯機會，就咁射入兩球。呢次係寶貴嘅學習經驗，付8令我哋加速成長。」