郭富城今日喺沙田馬場出席活動，見證近千名年輕人成功創下「最多人同時為雕像塗色」健力士世界紀錄。城城喺台上鼓勵年輕人，叫大家聽吓佢嘅勵志歌：「年輕人未必熟悉我嘅歌，大家可以上網聽下。」仲即場清唱幾句《強》。

同場仲有曼聯名宿白賴仁笠臣（ Bryan Robson），佢向城城送上足球，城城仲隨即表演控球技術㖭。城城謂自己同健力士好有淵源，希望可以鼓勵年輕人：「呢個係我責任，自己都當過傑青，希望更多人可以拎到呢個成就。」城城嚟緊開演唱會，問到平日係咪經常喺屋企練歌？佢話：「跑步嗰陣會唱，呢個我職業病。」咁對愛女Chant唱咩歌？佢甜絲絲笑謂：「兒歌啦梗係，點都要學，呢個係責任。」日前太太方媛出席活動時坦言要追仔，城城聞言話：「交番畀我哋啦。」

精選娛聞，喺晒《娛果》
http://fb.com/appledailyent