郭富城(Aaron)今日以明星大使身份，去到澳門旅遊觀光塔，出席「第三屆澳門國際影展暨頒獎典禮記者招待會」，頒獎禮將於12月14日於澳門文化中心舉行。澳門特別行政區政府旅遊局局長暨IFFAM籌備委員會主席文綺華、澳門影視製作文化協會會長暨IFFAM籌備委員會執行副主席周焯華等亦有出席。

大會宣佈本年「焦點影人」爲中國內地女演員姚晨，而韓國影壇新星林允兒（Lim Yoon A）將加盟成爲明星大使。而今年影展邀請了奧斯卡金球雙料影帝尼古拉斯基治(Nicolas Cage)擔任「大師班」主講嘉賓。

城城今日喺活動上表示，希望有機會擔任導演崗位，城城話：「希望可以做導演，拍攝自己想講嘅故事，將自己所認識嘅教導俾新人，如果自己成為導演，希望多啲用新人。」正於韓國拍戲嘅城城，噚日專程飛返香港出席今日活動，今晚又要飛返韓國繼續開拍戲，城城話：「月中完成拍攝，返嚟香港之後會即刻為世界巡迴演唱會進行綵排，24號首站廣州演出，之後會去到肇慶、南京、澳門、武漢等地演出。」

郭富城透露，自己心裏有一個故事想拍成電影，希望可以能夠喺澳門賽車跑道上，拍攝璀璨夜景飛車，城城話：「唔知幾時拍到，未必要自己演，可以成就一齣戲，就要搵適合嘅角色，自己今年已經拍咗3部戲，係時候要放鬆一下，準備演唱會。」Aaron表示，之前3部戲都要留鬚拍攝，本月完成拍攝之後，終於可以剃掉鬍鬚，佢話：「除咗剃鬚，仲要諗下演唱會染咩顏色嘅頭髮。」

精選娛聞，喺晒《娛果》
http://fb.com/appledailyent