美國按揭業面對嘅最大風險，居然係離婚率高企？有網友喺《MSN討論區》話：「唔少美國人結婚後一兩年就買樓，佢哋結婚時，使咗好多錢，畀唔起首期，所以要借次級按揭買樓；由於當地人嘅婚姻平均只維持7年，層樓可能只係供咗5年幾，就因為夫婦離婚，而要斷供，搞到要俾銀行收樓。」
佢仲話：「如果新婚夫婦申請按揭貸款，按揭公司為咗保障自己，應該要求個客畀多啲首期。若果個客係單身人士，冇欠落其他債務，而且有能力獨自供樓，按揭公司就可以放心借錢畀佢。」由70年代起，美國離婚率一直維持喺50%左右。
Pennyandpoundwise反駁：「兩公婆有兩份收入，通常能夠以更優惠條件造按揭，至於單身人士，就冇咁好彩。」

妙用相連戶

Herring話：「家陣有種新發明，叫做『套房式住宅』（suitecondo），啱晒嗰啲對婚姻缺乏信心嘅人住。其實係兩個相連單位，夫婦入住後，可以將兩個單位之間嘅牆拆除，將兩間屋打通；萬一夫婦離婚，就可以起番道牆，喺自己嘅單位分居，任何一方可以繼續住，或者將自己間屋出售。」
Pengu1n教路：「有種新產品叫『離婚保險』，如果夫婦離婚，保險公司會賠錢供樓。」Herring批評：「離婚保險可能冇乜人買，試想想，一對夫婦啱啱度完蜜月，就去買離婚保險，會失去浪漫氣氛。」有網友話：「離婚保險會令離婚率急升，因為部份夫婦可能乘機離婚，希望唔使供樓都有樓住！」