李彩華(Rain)、樂瞳、蔡思貝、蘇志威、蔡一智等，噚晚喺九展出席髮型師業界活動，Rain之前喺大陸拍咗套劇《回家的誘惑》，現場有啲大陸人見到佢，都仲提緊呢部戲，佢話：「好開心部戲可以深入民心，之後會再返大陸拍劇。」係咪拍一套劇已經可以買到一層樓?Rain話：「希望啦，不過香港樓價實在太貴，我會向唔同地方房地產入手，之前喺英國買咗鋪位，另外會喺泰國買樓花，媽咪鍾意泰國，有年佢咳得好勁，去泰國就唔咳，空氣好好多。」

Rain仲誇下海口話想每個地方都有自己嘅物業，南非都想考慮，因為自己鍾意食鮑魚，佢話：「去到邊都唔使租酒店，之前有朋友介紹買澳洲樓，但我好少去澳洲，因為鍾意英國，將來有小朋友都可以去讀書住，冇諗過以前事業低潮，屋企經濟有問題，拍個劇之後就可以翻身，好感恩。」

同場嘅蘇志威啱啱喺馬來西亞返港，宣傳下個月12月31號喺雲頂舉行嘅演唱會。草蜢早排開完紅館，因為跳足咁多晚勁舞都咁有電力，被捧為「樂壇金霸王」，阿細笑話草蜢的確係唔使抖，o依家傾緊下年2月去LA表演，真係冇休息過。講到阿細間禮服店贊助無綫50位小生嘅禮服，佢話：「我睇到啲服裝都好滿意，為佢哋度身訂造，表演完之後有幾個小生都話想買咗件衫。」之前馬會抽獎，阿細抽到可以去韓國學漂移，一直想學。

另外，樂瞳之前去咗澳門睇賽車，當時有場賽事，有位車手不幸意外身亡，樂瞳話：「我冇親眼睇到事發經過，只係睇到片段，但已經好震撼，現場嘅氣氛都變得好緊張。睇到個心唔舒服，明白呢啲活動有危險，車手好拼搏，工作人員一分一秒都唔鬆懈。」

更多娛聞，喺晒《娛果》
http://fb.com/appledailyent