詩姐呢個聲明真係殺白鴿黨一個措手不及,搞到噚日開完立法會內會同財會後,準備返屋企唞唞嘅張文即時折返政府總部,陪主席仁哥同李永達開記招回應。原來,呢個詩姐口中「雙方友好安排的午餐聚會」,唔係喺密會熱點金鐘港麗酒店舉行,而係喺高官政圈嘅飯局熱點──中環鏞記擺陣。
仁哥噚日喺記招上承認,自己同張文的確係12月同詩姐食過飯,但指當時佢哋三人都係客,因為個飯局係由《明報》兩位高層張健波同馮成章邀約,佢話「係由《明報》兩位老編張健波同馮成章主動請,大家傾偈」。
張文同仁哥坦言已經唔多記得當日食咗啲乜,只係記得當日有食鏞記最出名嘅燒鵝,仲幾好食。所謂燒鵝打人牙骱軟,唔知有冇因為呢隻好味燒鵝,間接促成詩姐向中央轉達白鴿黨嘅心意呢?但相信白鴿黨同佢哋都勢估唔到,當日吔咗呢隻燒鵝,會搞到白鴿黨今天被寸為燒乳鴿。不過,白鴿黨似乎一啲都唔介意變燒乳鴿,仲話今次政改投票深得主流民意支持,噚日白鴿黨喺政府總部開記者會前,八方喺現場就見到擺放咗三個署名「你的支持者」嘅花籃,當中分別讚何俊仁「為國為民」、張文光「造福人群」,以及向「瞓街卿」變「揮手卿」嘅卿姐致敬嘅「德政可風」。
雖然有花籃坐鎮,但詩姐出招,白鴿黨拆唔拆得掂仲係未知之數,因為好多人即刻質疑,咁白鴿黨之前係咪有隱瞞?佢哋一早想溝通,係咪因而唔玩公投?