繼續「老作」名校小一面試題。有學校已經問過「如果在圖書館唔見了媽咪，怎麼辦」，答搵爸爸和家傭姐姐原來最失分，千祈咪再錯。名校講求創意，答案不妨鬼五馬六，譬如：「唔緊要，我有四個媽咪，唔見一個好閒。」
聽講名校出動律師做評審，家長最好乖乖回答問題，當正自己是被告，別搶白出位損印象分，古怪諗頭留返畀阿仔。譬如問，孩子的偶像是誰。答孫中山夠晒可靠，不過創意一項肯定零分。由得孩子自由發揮最好。我阿仔暫時最鍾意Pocoyo，揀小飛俠和哈利波特都唔曳，只要不是選明星和大地產商就唔怕失分。（但奇在名校的終極「成就」，就是培養出大批地產商大老闆的左右手、政界名流和商界專才，有幾何教出動畫家小說家？）如果習慣答「我的偶像是我爸爸。」做老竇的要醒目，照鏡發現自己是鼻大氣粗那一類有銀型，趁九月面試前趕快去整容，整個馬友友、貝聿銘或者郎朗翻版才夠說服力。

以前聽聞名校面試時，小朋友例牌被試探家境，「平時搭什麼車」是必考題。今時今日家底厚隨時是暴發炒家，老粗一名，所以就算考生出入寶馬都假，面試時假如唔識牛池灣、坑口是地鐵站，通識水平唔慌高。六歲人仔最鍾意哪個地鐵站呢？答欣澳，理所當然。答黃大仙，因為婆婆鍾意去拜神，有孝心。答彩虹，因為可遇不可求，叫人學懂珍惜，EQ高人一等。答深水埗？每個月跟媽咪去做義工，有個拿綜援的死黨每次都會在站口等他……只要這個做評審的律師沒有欺騙綜援，聽畢也許會感動一下，一剔，取錄這個念了三個月面試班的蠱惑仔。