當年今日
關於我們

同陳豪蒲吧受盡嘲笑
馮仁昭四圍超:Juno女助手被炒 慘!

蘋果日報 2003/06/24 00:00


麥浚龍(Juno)個助手Daisy早排俾人影到同陳豪去街,因為佢身形略胖而俾人嘲笑。查實Daisy以前喺許愿嘅星工廠做嘢,同陳豪既屬同事又係朋友,雖然Daisy後尾轉去幫Juno手,但佢同陳豪間中都會約出嚟食飯同去酒吧飲嘢,點知俾人誤會佢哋拍拖。

迫放冇薪大假
據馮仁昭所知,陳豪同Daisy嘅去街相登咗出嚟後,重累Daisy冇咗份工!話說Juno嘅經理人公司叫Daisy放大假,初時叫佢放幾日,之後再通知佢放多兩個禮拜冇薪假;放完之後,公司又通知佢以後唔使返工,Daisy就咁俾人炒魷,佢都唔知發生乜嘢事,因為公司冇畀一個解僱理由佢,𠵱家Daisy重周圍搵緊工做。

西城秀樹腦梗塞入院
本來應承咗十一月會嚟香港為甄妮個唱助陣嘅日本歌星西城秀樹,前日因為輕度腦梗塞緊急入院,聽講起碼要住兩個星期醫院,手尾長唔長都未知。佢嘅發言人話西城上禮拜六去韓國濟州島開騷,突然覺得身體唔舒服,即刻返日本入院。不過佢除咗講嘢有困難外,其他嘢都應該冇乜大礙。

戴夢夢累fans蕩失路
戴夢夢噚日去大帽山為電子遊戲「頭文字D」拍廣告,夢夢着咗條連身短裙,青春迫人。夢夢話好想試吓揸車嘅感覺,可惜佢冇車牌所以冇得試揸,好彩後嚟有工作人員載佢去兜風。
另外,夢夢有幾個歌迷原本想探偶像班,但就蕩失路,最後要勞煩警察送佢哋到拍攝場地。
梁炳勸霆鋒收斂
梁漢文(梁炳)噚日去港台為《開心日報》擔任嘉賓主持,提到Beyond喺演唱會中暗寸霆鋒擲結他係儍人行為,梁炳話呢個係個人嘅發洩方式,不過佢都有向霆鋒提過有時要收斂。梁炳又話唔信謝霆鋒同陳奕迅不和,因為據佢所知霆鋒同陳奕迅近排都有一齊上去霆鋒間band房。

關德興兒子破產案再審
已故影星關德興個仔關漢泉遭中國銀行入稟申請破產,噚日喺金鐘高等法院開審。法庭上法官質疑點解關漢泉有層八十萬嘅樓,中國銀行只係追討二十幾萬,就要申請關漢泉破產,所以呢單案要延期再審。關漢泉事後話:「如果我破產,我老竇嘅遺物可能會被沒收,我點都要保護佢。」

麥嘉代濟公鬧政府
麥嘉兩年前幫亞視拍咗套電視劇《濟公傳》,但到𠵱家先喺亞視播映,噚日呢套劇喺灣仔舉行首播會,梁榮忠都有出席。講到香港被剔除疫區之名,麥嘉就借濟公鬧政府,佢話:「呢啲說話係代濟公講嘅,其實就算有冇SARS,香港都百病纏身㗎啦,乜祖國好香港好都係錯,總之香港就行緊衰運。」
empty
Juno同Daisy無緣再一齊工作。資料圖片
empty
陳豪:你哋放過佢啦!設計對白
empty
戴夢夢
empty
梁漢文
empty
關漢泉
empty
麥嘉、梁榮忠(右)