港台廣播處長梁家榮早前就宣佈，下年8月任滿後就唔會續約。到底「榮總」係因為心灰意冷唔做，定係引咎下台，八方就無從得知喇。不過八方聽聞港台新「一哥」嘅物色工作，正進行得如火如荼喎。其中就包括資深傳媒人馮強。

做過《南早》、《讀者文摘》管理層，又曾喺大專打滾多年，做過老師同公關嘅馮強，早排就喺佢Facbook度話，有獵頭公司打畀佢，問佢有無興趣申請廣播處長一職，佢當時就話要啲時間考慮吓。八方之後向馮強查詢，佢就話唔方便透露太多。

不過《蘋果日報》前老總鄭明仁就喺佢個Post度留言話︰「很多行家都收到同樣查詢，都拒絕了。」

仁哥同八方講，聽聞行內做開廣播或者電視台嘅資深傳媒人，十居其九呢排都畀獵頭公司搵過。佢仲話，基本上獵頭公司所搵嘅名單，同當年物色榮總嘅人選無太大分別，所以行內人都對邊個獲邀，都心中有數。

仁哥又同八方講，呢個位又要搞掂下屬、又要應付政府同建制派壓力，加上行內人見到榮總「前車可鑑」，大部份人連參與遴選都未必肯制，而佢識嘅老友，都唔可能做到「百分百順從建制意見」，所以佢相信政府可以搵嘅人選其實得幾個，「爭在最後係邊個肯做」，而家只係做場大龍鳳畀大家睇咁話喎。至於仁哥心中有冇邊位人選，佢就冇同八方明言喇。

有同樣俾獵頭公司搵過但婉拒嘅資深傳媒人亦都同八方講，做得呢個「三煞位」，好大機會要獲得西環首肯，所以就算獵頭公司揾佢，佢都相信自己只係「陪跑」。呢位資深傳媒人仲畀咗幾個可能人選畀八方，當中有早排被「明升暗降」，由新聞部主管轉任顧問嘅馮德雄，仲有掌管大台新聞部多年嘅袁志偉。不過呢位資深傳媒人都話，「大馮」喺當前政治局勢下，未必過到政治審查一關；至於「花蟹」雖然獲得政府同西環信任，但佢會唔會轉入熱廚房，就真係未知之數喇！

-----------------------------

《蘋果》英文版免費試睇：了解更多

英文版已登錄《蘋果》App，立即下載/ 更新：iOS / Android

-----------------------------

《本土情味》結集《飲食男女》雜誌經典欄目「老字號」文章，記錄香港40家飲食老店的動人故事，見證香港飲食史的甜酸苦辣。即日起，於各大便利店及書報攤有售，並於 《蘋果日報》你的優惠 網上獨家發售！