立法會議員石禮謙有「董事王」稱號，佢係15間上市公司嘅獨董，原來數碼港主席林家禮都唔差，今日天大藥業（455）委任佢做非執董，係佢第15個上市公司董事銜頭，同石禮謙平起平坐，但當中10間係獨董，唔驚畀港交所（388）關注咩？

72歲嘅石禮謙幫好多城中大孖沙嘅上市公司擔任獨董，例如鄭家純旗下新創建（659）、林建岳嘅麗豐控股（1125）、羅旭瑞旗下百利保（617）等。

58歲嘅林主席就行另一條路線，有傳統廠佬楊釗嘅旭日（393）、蔡冠深嘅新華匯富（188），二線地產商資本策略（497）；仲有有幫Billy簡（簡志堅）旗下嘅中國天然氣（931），比較多元化。

唔止咁，佢仲幫8間海外上市企業做非執董或獨董，交易所遍及亞洲、澳洲、歐洲、美洲，加上仲有一份喺投行麥格里嘅正職，只能夠用「忙到甩轆」嚟形容。

不過就算天大藥業請佢做兩年非執董，每年薪酬都只係7.2萬元，林主席應該就唔係為錢嘅。

但嚟緊港交所提議收緊獨董任職公司數目，多過6間嘅就要解釋，從投資者角度，主要擔心獨董兼任過多會分心，唔知最後港交所結論係點呢？到時林主席點揀呢?

蘋果財經，關心你飯碗
http://fb.com/appledailyatm