由韓國女星宋慧喬夥拍男星朴寶劍主演嘅tvN新劇《男朋友》，係首齣到古巴取景嘅韓劇，據悉主要都係喺首都夏灣拿拍攝，而古巴嘅靚景加上男女主角嘅靚樣，獲唔少劇迷大讚畫面唯美。

劇中，到古巴出差嘅喬妹想去馬勒孔海灘睇夕陽，喺酒店經理推薦下，喬妹去到聖卡洛斯城堡，並喺該處與朴寶劍邂逅，繼而上演喬妹挨住朴寶劍膊頭並深情對望嘅經典一幕。

另外，劇中亦會見到莫羅城堡及燈塔，而夏灣拿舊城區現時成為古巴軍事歷史公園，莫羅城堡、聖卡洛斯城堡就被列為聯合國世界遺產城堡。

隨後喬妹、朴寶劍離開聖卡洛斯城堡，赤腳前往碼頭，以及朴寶劍買鞋送畀喬妹嘅情節，都係喺聖卡洛斯城堡附近嘅廣場中拍攝，二人之後更去當地嘅人氣餐廳約會，之後喬妹及朴寶劍重遇嘅機場，就係何塞·馬蒂國際機場。

另外，劇中朴寶劍一個人散步拍照嘅地方係主教大街（Calle Obispo）附近一個手工藝品花園，主要售賣獨特嘅古巴紀念品。

而截至今日韓國時間下午2時30分，「男朋友拍攝地點」於韓國網站實時關鍵詞搜尋榜中位居榜首，證明《男朋友》掀起一股古巴熱潮。

精選韓流，喺晒《娛果》
http://fb.com/appledailyent