大姐明睇真D 6丨林建明死後捐身家做無言老師繼續遺愛人間： 我隨時行得

蘋果日報 2021/06/04 00:30

林建明大姐明藍潔瑛張子強心晴行動慈善基金梅艷芳無言老師捐身家情緒病
    「我已經籌備緊我死嘅話，自己擁有嘅嘢點分配，我自細希望做老師，但我始終做唔到，我就諗住做無言老師，有啲分配畀親朋戚友，其他就捐去畀慈善機構，其實我已經做晒呢啲嘢，隨時行得。」64歲的大姐明林建明決意死後捐身家捐遺體，繼續遺愛人間。
    大姐明10幾歲便要出身搏殺養家，80、90年代遊走無綫、亞視，成為當紅電視藝人，直至2001年一次意外，揭發出有情緒病，人生跌進谷底，也因為這個病，徹底改變了大姐明人生。
    「我做《明Show俾你睇》扑穿頭（被佈景板），之後完埋就休息醫治，好似冇乜嘢咁，跟住佢哋又係喺度鬥（無綫與亞視），呢邊開《各出奇謀》，又邀請我做，我咪試吓囉，嘩，一做完全唔係嗰樣嘢，同以前係兩個人，唔記得對白、唔識控制場面，導演喺我身邊憎到佢死，啲觀眾嚟答問題攞錢，嘩！咁貪心！又蠢又唔識嘢，全部都唔知做乜嘢，亂晒籠，亦好多時NG，夾硬捱到最後。」雖然大姐明表示意外後記憶力差了許多，但重提當年經歷仍一清二楚。
    empty
    為亞視主持《明Show俾你睇》時遭佈景板扑穿頭。（YouTube截圖）
    empty
    大姐明主持《各出奇謀》時完全不在狀態經常NG。（YouTube截圖）
    完成《各出奇謀》後，大姐明飛到英國旅行減壓，但曾經走勻全世界的她，今次英國行竟離奇驚到震，驚到日日幾乎不敢踏出門口，返港後終日匿埋屋企不想見人，也不想刷牙去厠所，凡事簡單複雜化，小小事弄得整個人大混亂，甚至一度有自殺念頭。
    「你成個人咁癈嘅？日日喺度瞓，又唔出去見人，乜嘢都唔做，有乜用啫？死鬼咗佢啦！」由於大姐明要履行一份已收酬金的廣告合約，在臨拍攝前一、兩日，終的起心肝向前港台DJ曾智華介紹的一位臨床心理學家求助，結果一見面，大姐明即刻崩潰狂喊，被轉介睇精神科醫生。「醫生見到我搞咗一輪，判咗我症：『其實你係有病，你患咗抑鬱焦慮症，有得醫嘅。』嘩！我當其時開心到呢，原來過去嗰年幾我成條廢柴咁，就係病咗！」
    大姐明積極接受治療，更於2004年成立心晴行動慈善基金幫助他人，2018年在家中暈倒失救離世的藍潔瑛是其中之一。
    empty
    曾靚絕五台山的藍潔瑛，2018年在家中猝死，終年55歲。
    「成件事完晒（後事），我喺度諗，係咪都要去拜吓佢呢？當初我成立心晴行動基金時，成日同佢一齊，陪伴佢，佢有嚟我屋企瞓，佢究竟葬喺邊？唔好煩佢家姐啦，因為佢家姐都好怕同我哋接觸，咁點好呢？嗰晚我喺度咁諗，點知第朝起身，開咗手機，個message彈出嚟，係藍潔瑛一個朋友，佢話畀我聽藍潔瑛喺邊個墳場幾多號，嘩，嚇到我吖，於是我即刻去，一入去好快睇到佢，跟住嗰晚又發夢，夢到佢好靚好開心、好快樂，咁我都釋懷。點解會咁講呢，因為有個影迷不停問我藍潔瑛喺邊度，佢知道喺邊個墳場，但搵極都搵唔到邊個位，其實搵到唔係咁容易，我覺得真係有電波有交流。」
    empty
    大姐明2年前拜祭藍潔瑛 ，感覺跟好友有電波交流。（資料圖片）
    這幾年大姐明身邊太多朋友離開，有些又年輕又健康，有些還相約好一起去旅行，但突然間，一個個在毫無任何先兆下離開，令她對生與死產生許多個問號，「人嘅生同死其實係點嘅呢？點可以決定嗰個人幾時生幾時死呢？係咪一個人死咗唔係慘嘅呢？其實可能係一個解脫去咗另一個世界好快樂？死咗去邊呢？係咪真係有電波呢？我成日諗呢個問題。我亦都唔怕死。」
    大姐明記得有一年到九龍塘省善真堂拜祭母親，順道想給梅愛芳、梅艷芳兩姊妹上炷香，地方不大，卻兜了兩次也遍尋不獲，正想放棄：「我個心就同阿梅講：『阿梅，老老實實，我入多嚟一次，有心裝炷香畀你，如果搵唔到我就走喇，你唔好怪我。』第三次我一入去，一踏入去一望就望到佢同佢家姐兩個，我話：『OK唔該晒。』真係有電波有交流㗎。」
    empty
    大姐明跟梅艷芳認識多年，1993年更是首屆演藝人協會委員。（資料圖片）
    還有人稱「大富豪」的賊王張子強，大姐明跟他雖然毫不相識，但彼此間卻有一些「感應」。
    「佢原來個位都喺省善真堂，小白（老公曾展章）諗住我哋咁多人喺度（省善真堂），不如佢都買定一個同我一個位喺度，跟住去睇，原來下邊就係張子強，我先生媽媽知道之後話唔好要，咁就冇要到。諗返轉頭，當初佢未俾人普及認識時，好主動揸住架跑車嚟亞洲電視搵我哋《今日睇真D》同佢做個訪問，當其時唔係我當值，冇派我去做，跟住嗰一輪我成日去睇樓，九龍塘有間house，我去睇，空寥寥乜嘢都冇，唔係好啱，冇幾耐話淺水灣有個單位對正個海好抵，諗緊好唔好買嘅時候，畀人買咗，後尾先知道呢兩間屋都係張子強嘅，睇佢兩間屋睇個靈位都掕到嘅，咁得意，我唔認識佢㗎，我覺得有啲感應。」
    empty
    張子強1997年接受亞視《今日睇真D》主持陳欣欣訪問。（YouTube截圖）
    2015年，大姐明因為腦部有多個動脈瘤而接受微創手術加上支架，為免動脈瘤破裂導致腦中風，大姐明會盡量保持心情平靜，「始終健康最重要，所以最後就令自己開心啲，去多啲旅行，唔好再做一啲比較太過用腦諗嘅嘢，或者令自己激動興奮嘅嘢。」今時今日大姐明處理慈善工作外，愛吃喝玩樂旅行享受人生。是否一生無憾？大姐明笑說：「可以咁講，每個人嚟到呢個世界都有一個任務，為社會為人民，我覺得我任務都差唔多囉，做咗好多嘢，我自細出嚟照顧屋企人，為社會服務，又好錫自己好開心，差唔多啦，好感恩。」
    採訪：戴彩煥
    攝影：沈健程
    攝錄：葉君海、馮嘉銘
    場地：泰泰
    empty
    大姐明在香港有不少物業，她已計劃死後捐身家遺愛人間。
    empty
    大姐明於2004年創立心晴行動慈善基金，雖然現時她已退任主席，但仍會參與基金大小事務。
    empty
    大姐明從小想當老師，既然在生做不成，就決定死後做老師償心願。
    empty
    大姐明創立的心晴行動不經不覺成立17年。
    empty
    心晴行動收到不少受惠機構感謝狀。
    empty
    心晴行動慈善基金獲不少慈長支持，好友余慕蓮便是其中之一。
    empty
    心晴行動曾邀得Twins力撐。（資料圖片）
    empty
    方力申曾支持大姐明出席活動。（資料圖片）
    empty
    世界各地都有大姐明足迹。（FB圖片）
    empty
    大姐明過去10多年愛旅行享受人生。（FB圖片）
    empty
    開心到跳起！（FB圖片）
    empty
    大姐明在鍾慧冰（左）生病時為好友剪腳甲，而2年前大姐明舊同學接受癌症治療時甩頭髮，大姐明決定剃支持，有情有義。（FB圖片）
    empty
    大姐明主持多年《今日睇真D》，結果不知不覺間患上抑鬱焦慮症也全不知曉。（資料圖片）
    -----------------------------
    蘋果初心不變！26周年「撐蘋果Tee」預售：
    你的優惠訂購（海外訂購按此）
    -----------------------------
    支持蘋果深度報道，深入社區，踢爆權貴，即Like蘋果專題及調查組FB專頁！