龔嘉欣同鄧健泓（Patrick）一對相差16年嘅忘年戀，喺舊年分手後，便傳出各自有第三者，男嘅被傳同前港姐張嘉兒一齊，女方被指一早搭上許家傑，但究竟係邊個劈邊個腿，都成疑問。咁啱近日鄧健泓喺《情越海岸線》裡面同「前前女友」李詩韻又有床戲又食波餅，有人打趣謂:「如果鄧健泓未婚妻個角色，唔好搵沈卓盈，叫龔嘉欣做就好喇。」

今日龔嘉欣接受商台訪問時，講番當日同鄧健泓分手原因，佢話： 「大家係有啲問題存在冇處理，做番朋友開心啲，係性格上某啲位（唔啱）。」 分手之初，龔嘉欣成日寫長微博發洩，而且負能量好重吓，令人擔心。不過依家見到佢嘅新相，已經成個唔同晒，唔止嘟嘴，仲著緊身Tee甜笑誘毒男，咦，鬥心返晒嚟啦。

龔嘉欣強調同許家傑係稱兄道弟，舊年分手時撞啱不時同許家傑拍嘢，先至令人誤會，不過兩人私下無約會。龔嘉欣話： 「我同佢(許家傑)冇可能一齊，嗰時報道出街，我都有同佢女友講，佢女友話唔緊要。」 至於鄧健泓同張嘉兒緋聞，龔嘉欣就冇去理，佢承認近日經已少咗聯絡，又謂分手初期都有同鄧健泓傾，若果畀人影到同其他人一齊時要點回應。