當年今日

一味窩輪:1715難免變廢紙

蘋果日報 2002/01/23 00:00


失驚無神,大市插咗落去,恒指唔見兩嚿,收10797,唔使講,啲藍籌認購輪梗係跌到一仆一碌。跌輪榜是日冠亞季,分別係和黃輪1765、滙豐輪1735同中移動輪1715,呢3件輪,最終變廢紙嘅機會極大。
呢3件末日輪,都係下個月到期,溢價唔低,下周新輪登場,數據拍埋贏成條街,佢哋唔易再搵人要,溢價會縮得更快。
單以數據論,佢哋亦好難出生天,尤其係1715,行使價34.2元,正股(941)現價只係22.6元,望正股喺下月尾之前升5成2,你話機會有幾大?即使望到,現價買隻輪亦只係打和。
姑勿論後市點走,如果想玩藍籌認購證,都係等下周新輪出籠至諗,因為除咗幾件石油輪外,現有嘅藍籌認購證件件都貴。

1769輕微低水
和黃(013)昨挫2%,帶動隻認沽輪1769彈升逾11%。1769下月底到期,雖然時日無多,但數據唔錯,現價1.54元,輕微低水(負溢價)0.07%,槓桿率4.7倍。睇淡正股揸呢件,應該唔會睇中都要輸錢。