下個星期六去澳門宣傳嘅萬人迷碧咸（DavidBeckham），日前把握同屋企人相處嘅時間，同愛女哈七（HarperSeven）同埋三個仔去享天倫樂。碧咸噚日喺Instagram放咗張哈七踢波嘅相，見佢着住裙仔加波鞋，對準龍門射波，雖然唔知佢射唔射得中，但係個姿態就滿分喇。

睇嚟老竇對哈七嘅表現都幾滿意，仲將佢比喻為美國殿堂級女射手韓美亞（MiaHamm）。碧咸話自己同三個囝囝一齊教哈七踢波，有佢哋悉心嘅教導，唔怪得哈七踢得有板有眼啦。