何超儀今年初獲賭王何鴻燊豪擲1億，自行開戲，預計一年約開拍三齣電影，處女作係驚慄血腥三級片《維多利亞壹號》，搵咗彭浩翔擔任導演，由超儀自己擔正演殺人女魔頭，全片斷手斷腳橫飛，超級暴力血腥，預計10月中上映。
彭浩翔拍咗部電影《維多利亞壹號》後，因為佢同超儀對電影嘅剪接問題出現好多爭拗，結果搞到反晒面，真係傷和氣。話說部戲拍好之後，超儀好緊張，專登喺荷李活搵咗人剪接，但阿彭就堅持要自己剪，一直冇交片出嚟。
初時部戲係諗住有好多暴力場面，但有消息話阿彭幾乎剪晒啲暴力場面，令到片主何超儀唔係咁同意，雙方為此嘈過幾次，喺各持己見下，阿彭始終未有將片交畀超儀嗰邊。

超儀發聲明

超儀嘅852電影公司噚日仲即刻發出嚴正聲明，強調同彭浩翔一直有簽製作協議，呢個協議係要保密同以互信為基礎，但近日有傳媒爆咗協議部份內容出嚟，所以超儀公司已將呢件事交畀律師處理。噚日記者致電兩人，但至截稿前二人仍未回覆。
超儀今趟似乎出師不利，同彭浩翔意見不合之餘，電影海報喺康城影展賣片花嘅時候，其中一張以亂葬崗為主題嘅露點海報仲俾發行商抽起，令超儀好激氣。