曼聯禮拜一宣佈，佢哋呢個夏天會去北美備戰，落實會到訪洛杉磯等城市。曼聯執行副主席活華特話，北美啲球場正，訓練設施又好，簡直係季前備戰最好嘅地方！曼聯舊年去北京嗰陣，因為「鳥巢」草地爛得濟取消曼市打吡，同埋四年前嘅「香港大農場」事件，唔知會唔會就係呢啲不愉快經歷嚇到紅魔唔敢嚟亞洲？

曼聯嘅聲明話，呢個夏天會去北美五個城市訪問，踢五場波，暫時已經定咗四個城市，分別係洛杉磯、鹽湖城、聖塔克拉拉同埋華盛頓。至於對手方面，曼聯就話遲啲公佈，但外界估計其中一場會對曼城。舊年夏天，曼聯原本同曼城喺北京嘅「鳥巢」踢表演賽，但因為北京落雨，搞到個場好爛，所以取消場地，所以相信兩隊今夏會補踢番場波。

舊年因為場地爛，搞到曼聯踢少咗場熱身賽，領隊摩連奴都唔多高興。可能見到亞洲啲場咁爛，所以曼聯今年就決定長駐北美訓練，活華特都講到明，去北美備戰嘅一大原因，就係嗰度啲球場靚。活華特話：「去北美訪問，我哋可以有最佳嘅季前備戰，所以我哋可以用到最頂級嘅訓練設施，同埋喺靚場度比賽。」