容顏憔悴的阿吟甫見記者來到,即禮貌地說聲:「麻煩晒!」,其八歲女兒更主動向記者打招呼,十分乖巧,難怪其父生前待她如珠如寶。
生前疼愛妻兒
「我先生份人好樂觀,對屋企好負責任,放工返嚟會陪仔女打波、踩單車,好錫佢哋。仔女知道爸爸唔喺度之後,開頭幾日好驚,成日喊,我已經同學校社工講,盡量留意多啲佢哋嘅情緒。」三十八歲的阿吟對記者說。
自從發生意外後,阿吟曾安慰子女說,父親的軀殼雖已離他們而去,他的精神仍然存在。
「我叫佢哋當爸爸返咗工,𠵱家每晚食飯我都要佢哋叫聲:『爸爸食飯』。」至於自己的情緒狀況,阿吟坦言:「頭幾日好難受,𠵱家就睇開咗。」
四十歲的羅少波,原從事貨車司機,與妻子結婚十四年,育有一對現年八歲及十二歲子女。
他近年與友人合資開設冰粒廠,供應冰粒予食肆及街市商戶,生意不過不失,惟去年發生沙士疫潮,百業蕭條,工廠定單大為減少,最終被迫結業,蝕掉數十萬元,至今還要按月償還欠債。