早前先講完馬會原本喺上個禮拜六，協辦成都舉行嘅全國賽馬速度大獎賽總決賽，個賽事最終都因為馬匹感染病毒需要延期舉行。據知，馬會最快會去到明年11月，先會再幫相關機構協辦賽事。至於提供個別有關辦賽事嘅專業意見，馬會就唔介意隨時幫手。
唔少人都對內地做嘢冇信心同有保留，實情又唔係冇原因。據悉，內地方面已經有意喺短期內，即係最快今個月尾就會喺武漢運馬過成都，補番之前取消嘅總決賽。而馬會亦有畀意見，講明若發現馬匹有大規模病毒感染情況，最好都係預番三個月時間畀馬匹休養生息，內地方面喺馬匹病毒爆發後咁快補賽，馬會已表明呢個做法並唔理想。
不過，馬會提供嘅專業意見，內地嘅相關賽馬機構就一於當你信口開河。大陸嘅嘢就係咁吹脹，一來對馬匹病毒感染冇危機意識，其次就算識嘅都未必會提出，最緊要有得威，你哋專業睇法係點你嘅事，阿叔就係唔鍾意聽。
無可否認，馬會幫手推動吓內地嘅賽馬發展，絕對係應該嘅，但係都要睇吓合作嘅單位點搞，用乜嘢態度做事。若然內地真係提前喺武漢運馬，喺成都補辦總決賽，一旦爆發馬匹病毒，絕對唔使覺得驚訝，內地好多嘢係要搞到累人累己先心息。
馬會管理層呢一刻應該慶幸上星期嘅總決賽取消咗，否則可能大把手尾跟。

阿Joe