趁主要對手雷神停賽，潘頓全日起孖累積73Ｗ，加大番領先優勢到六W，畀自己唞一唞氣。潘頓第二場贏完「君子協定」，之後好靜，只得第四場「勁利多」上名，以為佢又做童子軍日行一善。成班粉絲等佢再贏馬，等到頸都長埋，卒之尾場重新發威，策騎薛廐「包裝鬥士」大熱取勝，自製一口大熱孖寶。「包裝」系馬主、造紙大王理文造紙李氏家族，五日內經歷先苦後甜，禮拜三晚「包裝動力」喺雷神胯下跑泥地跛腳被人道毀滅，呢日原本運氣都麻麻，皆因「包裝博士」第三場精英碟三甲不入，幸好尾場及時轉運，「包裝鬥士」打開來港後勝利之門，助馬主李文恩今季首次報捷。講番薛達志，一連兩次日賽分別勝出「甜蜜蜜」及「包裝鬥士」，累積八W，壓過李易達升上龍虎榜尾四位置，馬房表現有番生氣。