韓國天團BIGBANG嘅隊長G-DRAGON今晚起一連兩日喺澳門威尼斯人金光綜藝館開其世界巡迴演唱會，演唱會原定晚上8時開騷，不過GD就遲咗25分鐘先出場，但無損現場過萬粉絲嘅熱情。

喺播完短片之後，全身紅色打扮嘅GD企上6呎高台現身，並獻唱《Heartbreaker》為演唱會打響頭陣，粉絲即時發出尖叫及高舉黃色皇冠燈為偶像應援。之後GD繼續唱第二首歌《Breathe》，其間又唱又跳仲同女dancerS有唔少親密接觸，令台下粉絲羨慕不已。GD亦有用英文講：「Hey Mauca,I'm GD」，而每講一句嘢粉絲都會發作尖叫回應。

唱到《A Boy》時GD除咗外套，露出入面紅色透視上衣，全場粉絲又再發出瘋狂尖叫。雖然大會就話唔畀影相，但粉絲都偷雞用手機拍照。

另外，喺演唱會場外都有唔少GD周邊商品出售，當中最貴嘅係有GD肖像嘅TEE，價值410蚊，而最受歡迎就係價值140蚊嘅戒指。