仲有個幾星期就係立法會選舉投票日，政治版圖洗牌，邊個政黨成為第一大黨點票後分曉，冇人挑戰自動當選嘅金融服務界議員詹培忠揚言，「潮州幫」仍然係立法會實力最強派別！金勞詹指立法會「潮州幫」，除咗佢之外，仲有鄭大班、陳智思、郭家麒、李卓人等，真係人強馬壯。
不過鄭大班、陳智思退下火線，郭家麒、李卓人又勢危，為免「格己冷」危危乎，金勞詹話好彩佢今年支持幾個潮州人參選，分別係會計界陳茂波同保險界蔡中虎，佢賣花讚花香，梗係力撐自己人，話睇好兩人選情，相信立法會潮州幫有望加入新成員。
至於唔係「格己冷」嘅旅遊界謝偉俊同資訊科技界譚偉豪，金勞詹都認為可以看高一線，尤其係前者，四年前只係差80票落選，今次金勞詹親自出馬，自言幫手拉到成30票，好有機會突圍而出。旅遊界選舉形勢都幾混亂，金勞詹咁有信心相信有佢理由，八方姑且聽之，邊個當選投完票至知。
上述候選人能否加入立會潮州幫，𠵱家好難講，工業界（第二）林大暉自動當選，佢都係潮州人，即係已經成為立會潮州幫一分子，金勞詹話潮州人好團結，喺政壇上集結力量真係唔可以睇小，更講笑話北京最大對手實情唔係泛民，應該係潮州人咁話，因為香港最有錢嘅人都係潮州人，加埋有咁多潮州人議員，真係有財有勢。

香港政治向來好少講籍貫族群議題，所謂立法會潮州幫，似乎係聯誼性質多個做實事，得閒去「打冷」多過論政，香港政壇講籍貫問題，首推應該係福建幫，民建聯蔡菜子每次選舉都大打鄉親牌，動員北角福建人投票，江湖傳聞佢哋更會搵人喺鄉下打長途電話嚟香港催票，不過鄉親只係投票機器，議政時民建聯都唔敢明益福建幫。
今次選舉蔡菜子又排第二位參選，民調顯示選情不太樂觀，八方近日聽到一個分析，指民建聯可能真係唔想蔡菜子當選，寧願分票畀葉劉連取兩席，點解要放棄蔡菜子呢？有人指黨高層想日後更易擺位安插新人，如果蔡菜子落選，民建聯日後就唔使再受制於福建幫，四年後安排新人接班可以閂埋門自己話事，否則就要花功夫勸退或協調蔡菜子出路。

mailto:[email protected]