當年今日
關於我們

落飛黨難影響「組合獨贏」賠率!

蘋果日報 2015/09/28 06:00

落飛黨難影響「組合獨贏」賠率!

馬會今季推出嘅新玩法「組合獨贏」,將會喺下個月底正式出爐。
所謂組合獨贏,同以前嘅Fun組玩法大同小異,分別係Fun組係硬性按馬號分成三組,今次組合獨贏就以賠率作為基準,大致分為大熱次熱、半冷門同大冷門三個組合畀馬迷投注。
組合獨贏每個組合都多過一隻馬,命中機會高咗,賠率自然冇單單買一隻馬Win咁高,賭馬嘅嘢家家有求,有人鍾意買大冷門,亦有人唔介意熱熱哋,最緊要有錢收。呢個新玩法係咪成功,就要落實受注後先可以引證。不過,馬會肯搞唔同玩法,始終都係好事。
落飛黨臨場大注出擊,已經係常態,由於佢哋專向冷馬埋手,好多時打到着晒燈嘅馬就跑出,好似未卜先知咁款。據知,馬會係因應大戶落飛,構思出組合獨贏呢個玩法,馬會已經預咗落飛黨唔會吼呢種玩法,組合獨贏嘅賠率唔易受到臨場大注落飛影響,玩法係專為公眾馬迷而設。
落飛黨好多時分散落注幾隻冷馬,馬迷冇可能隻隻跟到足,跟到亦唔一定中。假若一注組合獨贏嘅大冷馬組合,就一注囊括晒所有大冷門,雖然賠率可能得幾倍,但只要跑出冷馬,就同落飛黨一齊收錢,唔會再得落飛黨威晒。
當然,組合獨贏嘅另一類目標顧客,就係啲唔多識馬,純粹湊興買少少過癮嘅人士,勝在簡簡單單唔使研究,十足十賭波嘅主客和。

阿Joe