將軍澳工業邨嘅空氣有幾「心曠神怡」，喺呢度返工嘅華華最有發言權。雖然好多特異功能人士堅持話聞唔到由堆填區湧出嚟嘅臭味，港交所（388）就寧可信其有，對於家喺工業邨起緊嘅數據中心時，就畀多啲錢做多重工夫，希望冚到啲臭味咁話！
港交所喺將軍澳嘅數據中心預計今年9月入伙，家裏裏外外都搞得如火如荼，聽港交所設備託管服務主管梁廣樂講，呢個數據中心打完地基後，特別使多啲錢，加多層物料覆蓋個地下，等傳聞中嘅臭味唔好湧入室內。

雨後陽光最難頂

華華不禁哂頭，乜臭味唔係喺空氣中散播㗎咩？同數據中心做鄰居嘅壹傳媒大樓呢度冇開窗，中央空調一樣抽到啲臭味入嚟，好難相信搵啲物料冚住地下可以隔味囉！之但係，港交所都係聽專家意見先至會畀錢咁做，華華唔係專家，不宜多嘴。華華想講嘅係，港交所都唔信長實（001）主席李嘉誠所講，話呢度心曠神怡囉！
梁廣樂話，將軍澳數據中心開張後，港交所家喺中區嘅幾個數據中心將會陸續搬過嚟，最先係現貨市場系統今年10月搬，明年就到期貨及中央結算系統，估計將會有300幾位同事要搬嚟將軍澳返工。
華華畀個貼士呢300幾位仁兄，堆填區最臭嘅時間應該係夏天，特別係落完大雨，再出猛太陽，蒸番啲臭味出來嘅時候，真係唔聞唔知身體好！

李華華
mailto:[email protected]