天氣熱到爆炸，放假都係留番喺屋企嘆冷氣，煲吓碟舒服啲。呢輪巿面都有唔少新出嘅擴音機、播放器。發燒友鍾意逐件買，砌部啱自己心水嘅影音組合，但一般家庭都係買家庭影院套裝，快靚正嘛。近期呢啲家庭影院套裝質素越嚟越高，但價錢就越賣越平，好似Sony下月開始賣嘅兩款套裝BDV-E800及BDV-E300，仲係配埋Blu-ray藍光機嘅家庭影院組合系列，走平民化路線。

玩埋無線喇叭

Sony巿場經理Benny話，今次因應巿場需要推出咗呢兩套平民化嘅藍光機家庭影院組合，定價講緊係六千幾至八千幾，可以支持高清音效，玩埋7.1聲道㖭，「之前同類嘅機講緊13,000蚊，家平咗一截。」
Benny仲話，新機仲玩埋無線喇叭，設有自家嘅S-AIR數碼無線互動射頻傳送技術，以無線傳送技術將訊號由主機傳送環迴立體聲到無線後置揚聲器，「咁樣唔使有條喇叭線。」
講到畫面，兩款型號都採用x.v.Colour技術，令色域比普通標準色彩高達兩倍，令影像更自然逼真。家庭影院愛好者可利用部機嘅24pTrueCinema模式睇電影，畫面仲更加流暢同有電影感，「睇DVD碟都冇問題，可以倍線增到高清，啲畫質都唔會點輸蝕過藍光碟。」