日本人氣組合NMB48昨晚喺亞洲國際博覽館Runway 11舉行首個香港演唱會「NMB48ASIA TOUR 2017 in HONG KONG」。山本彩為首嘅NMB今次一行16位成員來港開騷，成員們昨日凌晨4時許才到埗，有粉絲早一日嘅中午開始到機場守候偶像，有人更帶蛋糕及禮物接機，而NMB大清早抵港後小休幾小時即為港騷作準備。

演唱會大約於晚上7時半開場，先以《海岸邊最可愛的女孩》打頭陣，山本彩率領NMB隊友白間美瑠、沖田彩華及吉田朱里等載歌載舞，當連唱《北川謙二》、《Oh My God》及《我們的發現》之後，佢哋就用廣東話講：「大家好！我哋係NMB48 。」白間話見到香港粉絲真係好開心，接住由市川美織開始逐個用廣東話自我介紹，雖然已有人出貓邊睇邊讀，但大部份嘅廣東話都係聽唔明，當輪到一姐山本彩就話：「請多多指教，你哋鍾唔鍾意我哋呀？我哋都好鍾意你哋呀！」贏得熱烈歡呼聲，之後就由白間solo獨唱及分隊表演，全晚共唱《絕滅黑髮少女》、《Ibiza Girl!》、《榴槤少年》等多首人氣單曲，其間每人又將手上嘅簽名摺扇拋向台下fans。

唱到Encore，眾人換紅色tee唱出大熱歌曲《365日的紙飛機》，之後與台下歌迷大合照，趁臨走前仲叫觀眾拎手機任影，最後並手拖手鞠躬講：「多謝、鍾意Hong Kong！」但完場時全場歌迷卻唔肯離場，約9時10分，全部16位成員再次登場第二度Encore，唱出《NMB48》，山本彩表示香港歌迷嘅歡呼聲十分熱烈，真係令佢開心到想喊。完騷後，彩姐同太田夢莉、吉田朱里拍片用廣東話答謝港迷講：「多謝！鍾意Hong Kong。」吉田朱里仲喺社交網留言話呢個港騷會畢生難忘。