「娜姐」周秀娜夥拍辰亦儒主演嘅網劇《美女公寓》，已經播到第三集，仲成為本星期國內網劇開播冠軍，尤其第二集入面娜姐著住套黑色性感內衣，替辰亦儒推背按摩，加埋浪漫嘅配樂，直頭鼻血已噴。

但原來全部都只係辰亦儒自行幻想出嚟，實情只是娜姐拍佢膊頭。不過估唔到娜姐受訪時，竟然話要向辰亦儒道歉﹕「有少少覺得對佢唔住，因為第一日開工就要拍場嚇佢嘅戲，然後再同佢拍另一場按摩戲，為咗補償佢我真係有認真幫佢推背按肩頸，舒服到佢瞓著咗！」

講番嚇辰亦儒嗰幕，原來係講娜姐變身貞子，披頭散髮响地下度爬，嚇到辰亦儒死死吓，回想呢場搞笑貞子戲，娜姐笑話：「我成晚趴喺度，拍攝時仲要趴住行路，膝頭哥瘀晒，真係好痛。不過呢個貞子造型好受歡迎，全個劇組都搵我合照，話我好清秀，好似『倩女幽魂』，我自己就覺得係『線路繁忙』，因為同時有太多人來搵我合照。」

除咗辰亦儒中招外，連唔知情嘅保安哥哥都俾佢嚇餐死﹕「拍攝現場去洗手間要行一段路，沿路又冇燈，要用手機嘅電筒照住，突然附近有幾個保安見到我白色長衫披頭散髮嘅造型，嚇到成個彈起！」