【約旦直擊】星如賽後難忍淚水 「打得好差，好對唔住呀！」
蘋果日報 2020/03/11 19:03
曹星如約旦直擊奧運拳擊亞大區資格賽
曹星如（Rex）在重壓下失利，與奧運入場券失諸交臂，賽後他難忍淚水，在擂台上大喊「好對唔住呀！」，又自責「打得好差、打得好差」。燈光聚焦，背景音樂隆隆作響，但這刻空氣中只餘快門聲和啜泣聲。
苦練兩年多迎來這節九分鐘的比賽，直接入圍奧運的夢想就在自己的拳頭上白白溜走，未待拳證宣佈賽果，Rex自知無望回天，一直低頭，最後致謝觀眾時更在擂台大喊「好對唔住呀！」。往採訪區走時，本來他還嘗試微笑，但翻滾的情緒終究壓抑不住，他甫開口眼角已泛淚，「好對唔住，我打得好差，完全做唔到想做嘅嘢，好對唔住。」開賽早段對手不時以揮出直拳，Rex不滿自己心急搶攻，未看準時機又中拳收場，節奏散亂，「我步法好急，完全做唔到避開對手進攻先還擊，我太心急去搶攻，自己所有嘢都亂晒。」
一仗報捷即成56年來香港首位躋身奧運的拳手，全港觀眾寄予厚望，即使八強落敗後，Rex還收拾心情指會以平常心應對，但今次敗陣，Rex不諱言感到壓力，他一臉失落說，「今次真係有壓力，今朝過完磅食完早餐，諗住休息一陣微微瞓一陣，但腦裡面實在太多嘢諗，完全瞓唔到，諗緊自己要做咩、戰術啦打法啦。」未幾他突然沉默下來，找毛巾往眼角拭淚，「好對唔住 ，係咁多，唔好意思。」說罷他便往通道走去，忽爾傳來一聲咆哮劃破死寂，這是以往採訪曹星如不曾見過的畫面。
賽後Rex於社交網站發文，表示自己不在狀態，自責表現差，「內心好唔舒服，完全做唔到應該做嘅野，連最基本嘅野都做唔到，好嬲自己點解可以咁差，動作慢，反應慢，完全冇方向，唔知自己做緊咩。」大批網民留言支持，如劍擊運動員江旻憓鼓勵他好好休息繼續練習。
記者：洪量丰
攝影：王子俊
攝影：王子俊
星如賽後難忍淚水。