2016年12月5日，黃夏蕙成立咗「夏蕙慈善基金」，目的是為幫助長者。當日夏蕙姨喺活動上宣稱：「我一生人都好體恤老人家，我好幸福，有屋住有飯食有人養，但有啲老人家居冇定所，成立基金就係為佢哋生養死葬。」當時佢仲話揀咗中山買地起老人院：「暫時起一間先，因為要買埋塊地，所以估計都要幾千萬。」

「黃夏蕙慈善基金」至今仍運作，亦有舉行義演，為基金籌款。如今年4月，黃夏蕙便與八両金、魏秋樺等於新光戲院舉行慈善演唱會，目標籌得500萬元。另黃夏蕙早前亦透過基金，向不幸在馬爾代夫遇溺身亡的「空中少爺」嚴卓斌的母親，送上5萬元善款作經濟援助。

雖然為善不甘後人，但近日黃夏蕙卻捲入錢銀糾紛，當中亦涉及針對「夏蕙慈善基金」一些傳言，黃夏蕙一直不作回應。惟至今日凌晨三時左右，佢老人家突然於fb專頁及個人fb發聲明，第一句就爆seed：「我唔出聲，唔代表我唔知！」

黃夏蕙寫道：「我唔出聲，唔代表我唔知！

「近日我喺Facebook受到騷擾，有人不斷登出用我嘅名、同照片，想惹起我嘅回應，我只可以同妳講，『曾經受了教訓，得了歷史的指引！』21年前的我，因為我強出頭，幫姊妹爭公道，引來香港人嘅笑話；21年後今日嘅我，只會用：『唔屬於自己嘅事，一定唔會理！只會一笑置知！』嘅態度處理。

「由於郭xx先生早前已經主動宣佈同我脫離上契關係，所以我唔方便再同郭先生接觸，琴晚已經托人打俾佢，叫佢唔好再用我嘅肖像做任何活動同商業宣傳。其實我已經80幾歲，有啲乜嘢神奇嘢未見過呀！

「叫得我做契媽，為人必須向善，團結一致，可以鬧人（因為我都經常鬧人），不過千萬唔可以害人，可以成為契仔契女就係一種緣份。我要每一個契仔契女行出嚟都可以昂然闊步，腳踏大地；面向人群，成為人中龍鳳。

「我只可以好肯定講一句，冇任何人同任何事，能夠阻止我做慈善嘅心，因為老人家無依無靠係好慘嘅事，所以我已經鐵了心，善用『夏蕙慈善基金』為老人家做好多好多善事嚟幫佢哋安享晚年。完。」