呢次選舉，建制派絕妙配票，配到香港人眼都凸埋。除咗中資機構同地區組織幫手之外，原來建制派要靠輸入外勞幫拖。據聞，新民黨嘅葉劉淑儀得到嚟自強國嘅義工效勞。有目擊者話，喺9月9投票當日，呢班為葉劉助選嘅強國大嬸，一邊拉票一邊大跳「秧歌舞」娛賓，連本地嘅葉劉幫義工見到佢哋咁失禮，都冇眼睇，即時閃開劃清界線。太古城話晒係港島區中產聚居地，有泛民義工當日拉票，一到場就見到有位操純正普通話、貌似女幹部嘅師奶駐場指點江山，不斷call馬嚟幫葉劉派單張。經吹雞後有成10多位強國義工嚟幫手，而本地嘅葉劉義工就得嗰幾丁友。