又係亞視。

繼續係關於重拍版權嘅問題。不過今次唔係《我和殭屍有個約會》，而係《英雄本色》。

本月18日，新亞視宣佈開台記招上，新任行政總裁吳雨宣佈未來一連串大計，包括會拍一啲啱年輕人睇嘅重頭劇，有啲同大陸合作嘅幾億投資大製作。吳雨話，係一定，一定，要有大陸市場，加番啲香港元素，其中《英雄本色》電影版改拍成電視版：「已經買咗個版權落嚟，我哋會變佢做電視劇，至於幾多集，有咩演員，我哋就遲少少先講，要同國內開會先知。」吳雨揚言投資唔止幾億！（新聞連結： http://bit.ly/2Bs4bfF 　）

《英雄本色》有兩套，一套係1967年出品，由龍剛執導，謝賢、王偉同石堅主演嘅版本，另一套就係大家熟悉嘅吳宇森版本。咁亞視係重拍龍剛版本，定係吳宇森版本呢？

為免亞視再發生好似《殭屍》呢個咁不美嘅誤會，於是，馮德倫所屬的電影公司FILM MAGIC PICTURES，今早就出咗個關於《英雄本色》版權嘅聲明：

「新亞洲電視開拍《英雄本色》之報道，FILM MAGIC PICTURES 已於2005年永久擁有1967年龍剛導演原版《英雄本色》之所有相關版權（包括播放，改編，重拍等權利）。」

《蘋果》即致電亞視新CEO吳雨求證，佢話：「我哋係拍周潤發版本，唔係拍龍剛版本，我哋係同Fortune Star（星空傳媒集團）買，已經俾晒錢，如果唔係嗰日記者會我咃都唔播得嗰部戲啲片啦。」問吳雨用咗幾錢買版權？他謂：「商業秘密唔講得，總之唔少錢啦。」

候任亞視外事部總監曾醒明補充：「我哋係向『星空華文傳媒電影有限公司』購買相關版權，我哋都要求對方出番一份聲明，證明我哋係依法律程序購買，但因為呢幾日係聖誕假期，過幾日會補發。亞視復出受到各方面關注係好事，證明大家都好關心，我哋會努力做好嘅。」

據業內人士稱，其實當年吳宇森徐克開拍《英雄本色》嗰陣，都曾徵求龍剛同意，因為成部戲故事架構人物都係緣於龍剛，故要取得其同意才可開拍。所以早前有電視台重播吳宇森版《英雄本色》，都需要取得FILM MAGIC PICTURES同意。

相關文章：
【國產Mark哥？】亞視開電視劇《英雄本色》 吳雨：用多啲大陸演員
http://bit.ly/2Bs4bfF

【回憶是屬於真‧港人】連版權都未搞清楚 大陸導演拍《英雄本色4》成疑
http://bit.ly/2BXoYJa

【亞視新CEO：真係好亂】永恆亞視翻拍《殭屍》？Fox發聲明：本公司獨家擁有版權
http://bit.ly/2DydBHK

更多娛聞，喺晒《娛果》
http://fb.com/appledailyent