羅富全開倉以嚟出馬唔算多，但短時間內已經贏咗四場頭馬，亦有四個位置，以新馬房嚟講當然係非常標青，已經獲得廣大馬迷肯定。

過去跟過蔡約翰及大摩兩個冠軍阿頭做副練，升正冇耐就有咁好成績，證明羅富全本身亦係真材實料，加上作風明刀明槍，睇嚟羅廐成為華人大倉指日可待。

羅富全有一半頭馬，包括「銘記心中」同「鑽之友」，同埋打叠上名嘅「鄉村輝煌」，都係嚟自以往嘅吳定強馬房，好自然令人比較兩個新舊練馬師，同一手馬由唔同練馬師訓練，成績可以相差咁遠。

其實最大嘅分野在於心態，新練馬師一定進取，做足功夫唔會三心兩意，相反老一輩練馬師經常收收埋埋、揀飲擇食，成日仲望一箸夾中嘅心態。

家陣競爭咁激烈，以前華人練馬師嗰套已經行唔通，有實力馬唔去搶攻，好易肥佬收信兼冇牌，被淘汰亦係好自然嘅事。

不過，練馬師有達標機制絕對冇壞，確實應該汰弱留強，騰出機會俾後生一輩上位，好似全哥咁，其實好多人都覺得佢一早已經可以升正，因為種種原因拖延，令佢今時今日先可以開倉，某程度係浪費咗有能者嘅發揮機會。

近年由副練升正嘅新晉華籍練馬師，好似蘇偉賢同羅富全，都證明到有獨當一面嘅能力。上季吳定強退休後，現時仲有一個練馬師空缺，其實馬會都唔需要一定搵海外練馬師填補，現時本地副練亦有資深同有能力嘅人才，馬會應該諗吓再提升多個本地副練，畀機會呢類人才。

喺發牌方面亦唔使墨守成規，不妨加快審批同喺季中就公佈人選，家陣賽季咁長，應該畀多啲時間新練馬師做足準備。

阿Joe