三大影帝郭富城、梁家輝、周潤發加埋彭于晏、楊采妮、文詠珊（JM）等等演出嘅《寒戰II》將會喺今年暑假上映。

電影其中一場走犯場面喺港鐵西營盤站拍攝，不過喺港鐵站拍戲有好多限制，為咗喺限時內完成任務，到正式拍攝要分秒必爭，劇組由凌晨2點開始搬運拍攝器材，拍到5點天光前就要走，而現場有成近300個「臨記」，所以劇組喺正式拍攝前，特別租咗個體育館先做綵排，彭于晏就同對手動作戲，將對方成個人抱起向後摔。

當日場戲係講城城喺逼滿市民嘅港鐵站入面，押送犯人彭于晏，手上面又拎住放咗炸彈嘅行李箱，因為彭于晏俾同黨楊祐寧救走，而城城就要向另一個方向跑，免得手上炸彈傷及無辜。城城同彭于晏因為來來回回跑咗好多次，搞到操到成身肌肉嘅彭于晏都話頂唔順話：「快跑到沒氣了。」

而城城事前就做足準備，佢話：「每晚11點做準備，化妝整頭，每日得4個鐘拍好趕，大家都要好集中精神。雖然我哋已經做咗好多準備，但現場總會遇到一啲問題，但大家都好認真同專注，好開心可以順利完成。」