日本動畫《瑪莉與魔女之花》將會喺今個聖誕檔期公映，蘇麗珊為動畫主角瑪莉任廣東話配音。日前蘇麗珊現身柴灣配音室接受《蘋果》訪問，即場測試佢嘅配音功夫。

今次挑戰要求蘇麗珊分別以唔同嘅聲線去聲演老中青，首先係要用劉德華腔去講出：「今時今日咁嘅服務態度真係唔夠㗎。」然後再挑戰張柏芝係《喜劇之王》入面同星爺嘅對答：「你養我呀？傻仔你顧掂你自己先啦？」再跟住就要挑戰葉德嫻嘅《桃姐》，變成一把老婆婆嘅聲音去講：「幾大就幾大，燒賣就燒賣啦。」到最後仲要變身《捉妖記》嘅胡巴，挑戰胡巴嘅獨特叫聲。

蘇麗珊話自己日後都好想嘗試唔同嘅配音角色：「我想試下為死物配音，例如辦公室入面嘅影印機，可以喺第三者嘅角度睇下周圍嘅人發生咩事，例如我覺得嗰個男仔好靚仔，我可以印得慢啲咁咪可以望佢耐啲，又或者對我唔好我嘅人就Jam佢紙。另外我仲想試吓配類似譚仔米線入面，嗰班廣東話講唔正嘅阿姐，即係講『墨演(丸)、支(豬)肉、死(寫)得未呀？』嗰啲，我覺得好好玩。」

髮型 - Him Ng @ the attic
化妝 - Will Wong @ WiLL makeup
服裝 - ithk

更多娛聞，喺晒《娛果》
http://fb.com/appledailyent