日本電影《NANA》女主角中島美嘉曾經係氣質歌姬，不過近年佢嘅濃妝越來越詭異，面上眉毛仲買少見少，最近一雙眉毛已變成只得兩點，令中島美嘉同當年簡直判若兩人。

中島美嘉雖然已經走晒樣，但佢同排球選手清水邦廣嘅姊弟戀開花結果，結婚近三年都仍然恩愛，儘管各有各忙，但清水邦廣日前上節目時提到愛妻時都流露出幸福笑容。

下個月，美嘉會推出全新細碟《A or B》，除咗同名點題作之外，碟內另一歌曲《Happy Life》由著名音樂人小林武史負責監製，更同小林武史愛將Salyu合唱，而剛曝光嘅兩款封套，美嘉穿着女神裙打韆鞦，構圖風格甚有全盛時嘅影子，死忠fans當然一致好評。