西區有人當街潑不明腐液，路過狗狗慘中招，四掌紅腫爛肉。陳小姐6月4號中午12點幾拖住快將12歲嘅約瑟爹利愛犬「朱古力」落街散步，途經堅彌地城新海旁一間食店門外，一支燈柱旁邊有一灘液體，朱古力踩落去之後即刻唔妥，陳小姐憶述：「佢好快左手抽起咗，行唔到，趷下趷下，我以為佢抽筋定拉親，即刻抱起佢，去附近朋友開嘅餐廳坐低，擺佢落張凳佢都係趷起，我就抱佢去睇獸醫。」

當時醫生一睇，發現朱古力四掌紅晒，左手最嚴重，醫生要幫佢剃毛先可以用消炎水幫佢抹傷口，棉花黐住好多啡色凝固物體。陳小姐話初初聞唔到有味，再聞就聞到好濃烈鹼水味，唔刺鼻嘅，醫生同佢講，無論高濃度嘅鹼性或酸性都足以灼傷皮膚。

之後醫生處方抗生素、藥膏、止痛消腫藥畀朱古力，陳小姐返到屋企幫佢洗傷口、搽藥膏，夜晚朱古力嘅四掌已稍為消腫，但傷口附近有爛肉情況。陳小姐好心痛，亦自責以為係一灘水，冇即刻抱起朱古力。之後陳小姐的朋友都有通知嗰間食店，職員否認他們潑過腐液出街，但都即時出去沖洗地下。

陳小姐憤慨：「行過一下已經灼傷，你諗下有幾濃烈？我覺得係唔好彩，唔知係乜人會潑啲腐蝕性咁強嘅液體喺地下，我深信人掂到會毀容，有冇必要用咁強烈嘅嘢去清潔地下呢？」佢又話，其實嗰條路好多人放狗會經過，擔心再有人或動物中招，通知咗食環署，仲考慮緊報警。醫生相信朱古力兩、三日會逐漸康復，陳小姐依家最驚佢會傷口感染，暫時唔會帶佢出街，等佢休養。

你敢爆，我敢獎！ 即Call《蘋果》24小時爆相爆片熱線 ：63836568