韓國天團BIGBANG成員太陽近日正進行海外巡迴《TAEYANG 2017 WORLD TOUR [WHITE NIGHT]》演唱會，今日更巡到香港亞博館見港迷，不過保安就唔見好嚴密，只係為免混亂，粉絲需喺場外排隊分批入場。

太陽襲港開騷，除咗引得粉絲支持，亦吸引男星張明偉、Super Girls嘅Aka、莊思敏、湯洛雯、C AllStar、陳浩民、蘇麗珊等嚟睇騷。

演唱會約晚上7時15分開始，一身白色打扮嘅太陽以《Ringa Linga》打頭陣，粉絲立即高舉皇冠燈並尖叫，及後太陽用英文問粉絲準備好未，氣氛高漲，隨後勁歌熱舞《Body》，仲同女dancer熱舞，台下粉絲尖叫得更大聲，太陽更瞓地演出，相當投入。太陽緊接獻唱《Super Star》時又照顧埋兩邊嘅粉絲，喺台上行嚟行去。