袁彌明日前喺facebook撰文啄實轉行為人師表嘅前大律師林作，仲直踩對方係「一個連頭髮都梳到亂糟糟、分手後仲不斷抽前女友水宣傳的西環契弟」，辣㷫林作寫番篇文嚟反擊（新聞連結： http://bit.ly/2vwJrVf ），今日重提此事，袁彌明話：「件事我冇乜理，其實當初只係想講30歲女人唔使悲觀，我自己都37歲，覺得狀態比以前選港姐仲好，當年我24歲選美。」林作話唔識袁彌明覺得女方搵佢抽水，袁彌明話：「千祈唔好同女人講抽水，女人過咗30歲要講保濕，用啲好用品，女人要keep住靚，希望成為美魔女係我目標。」

林作形容袁彌明就像潑婦罵街一樣（新聞連結： http://bit.ly/2wQ4DEC ），袁彌明話：「唔好再講喇，講番自己。」問到佢係咪自此要同林作畫清界線，唔會再喺網上點名談論對林作，袁彌明話：「其實我只係以過來人身份講男女睇法，真係好奇怪o依家啲後生仔女會好悲觀，叫佢哋keep住健康同靚，建立自信，香港女仔唔使咁悲觀。」

袁彌明與林作和麥明詩完全冇接觸，今次無啦啦網上言論掀是非，袁彌明話：「我有時都會講吓男女，我只係鼓勵女性例如創業有助建立自信。」哦，咁簡單咋？

講到生小朋友袁彌明隨緣，話自己已經37歲，但又慶幸老公唔係長子，自己唔係長女，呢方面壓力細好多，生意同湊小朋友之間，覺得自己太專注去工作，未必專注到湊小朋友，所以生BB仍要考慮。