【引渡惡法】沉默中爆發 連登仔放下鍵盤擺街站反送中
高登仔惡法真面目連登仔引渡惡法逃犯條例
高官為硬推「送中惡法」,「膠論」連篇,過去予人「鍵盤戰士」印象的「連登仔」和「高登仔」,此仗也走上街頭,自發派單張及創作改編歌,向港人力陳「送中」惡法問題所在,同時呼籲全港「巴打絲打」6月9日上街反惡法。「香港現時只餘下兩條路,你一係喺沉默裏面爆發出嚟,改變呢個唔想見到嘅現實;一係就等死,我絕對係一定會出聲!」網名「在沉默中爆發」的「連登仔」Alvin如是說。
今年23歲的Alvin將於9月於大學修讀環境系,與政治毫不相關。他坦言過去「超級政治冷感」,首次參加遊行集會是2014年雨傘運動,當時只2次短暫逗留金鐘。傘運未能迫使政府政改讓步,Alvin與很多香港人一樣感到灰心,2015年起不再看新聞,直至2016年香港發生銅鑼灣書店、DQ議員、旺角騷亂等事件,他重新關心政治。
能激發Alvin由透過鍵盤作戰,改為大熱天時上街派傳單「反送中」,除了特區政府硬推送中的惡劣手法,以及中聯辦明目張膽粗暴干預,他身邊同學和朋友對修例的漠不關心,亦是關鍵原因,「香港好多人都唔知發生緊乜事,連對佢哋利益同香港經濟有乜損害都唔知,所以我就決定發起派傳單。」
為了「反送中」派傳單行動,Alvin特別將網名改為「在沉默中爆發」,他解釋:「呢個係魯迅名言,佢話不在沉默中爆發,就在沉默中滅亡。香港現時係得兩條路,你一係喺沉默裏面爆發出嚟,改變呢個唔想見到的現實,一係就等死,我絕對係一定會出聲。」
然而要一眾「巴打絲打」同在沉默中爆發並不容易,Alvin最初試過在連登、高登和香港討論區洗版呼籲網民協助派傳單,但帖文在高登未獲積極回應,他為「深入敵陣」而開設的3個香港討論區賬戶,更在短短半小時即統統被封鎖。
最終他接受友人建議,在連登發文分享與約10名義工派單張的相片,力證「連登仔唔係齋講唔做」後,該帖文除獲逾萬名連登「巴打絲打」讚好,更有逾200名網民報名加入,成員至今先後在紅磡、大圍、寶琳等港九新界各區派發傳單。
《蘋果》在寶琳站外與Alvin訪問當日所見,自發到場派傳單的以年輕人為主,亦有部份為中年人,長者則較少。他們派發傳單時誠意十足,除積極主動遞上傳單,部份成員更作90度鞠躬,與建制派撐修例的「Hea擺式」街站完全不同。他們沒有任何薪水,反而要逐一「夾錢」數十元印製單張,為反送中「出錢出力」。
對此現象,Alvin說:「如果你有留意,其實喺街度,好多人都用連登,佢哋唔係只係嗰批唔出聲嘅人或者毒男,其實有男、有女,周街都係。其實連登仔即係香港人,大家今次都有一致立場,想為香港做啲嘢。」
形容今次是香港「生死一戰」的Alvin表示,最重要行動能令更多港人了解送中惡法之禍,同時再次團結香港年輕人,「因為始終香港嘅未來、香港嘅民主、言論自由,全部都係靠香港呢批後生去守護。同埋佢哋係最有資格出聲,因為佢哋仲要喺香港生存多好多好多年,佢哋可能有下一代,佢哋亦要為佢哋下一代負責,我都希望佢哋為香港付出多少少」。
他表明會參加6月9日反送中遊行,希望當日有比03年反23條更多的香港人站出來,「香港人6月9日一定要出嚟,唔係做俾呢個政府睇,要做俾全世界人睇,香港人係識反抗嘅,係對呢件事係有意見,絕對唔係話好多人支持(修訂),建制派話有40萬人簽名,我哋就真係真人出嚟,有幾十萬人出嚟,活生生咁同佢講:我哋係反對嘅」。
A)「連登仔」GG(19歲,目前無業)
「我希望大家係時候醒吓,你佔中嗰時唔醒,無問題,但現在真係再唔醒,呢個世界就真係完。(送中惡法)最大問題,係無端端俾人屈咗上去(大陸),無端端畀個罪你,然後北上去中國(受審),我連自己生活都無保障,咁我梗係要出嚟啦。」
「你可能做唔到幾多日(派傳單),但都希望可以盡量出多啲時間,唔係只係留喺屋企做keyboard fighter咁樣囉。其實今次係已經有其他國家援助,多少都畀佢哋攞返多少少炮彈去支援我哋。連我咁嘅廢青都肯出嚟,咁點解連你哋咁成功嘅人士都唔出嚟?呢個係我想帶出嘅訊息。」
B)「連登仔」Jayden(18歲,中大一年級生)
「我本身係一個大學生,我覺得知識分子喺呢啲時候,係特別需要企出嚟,呢個亦都係我哋中大人文精神提倡的地方。所以我企出嚟做呢啲事,係一啲好理所當然的事,去喚醒身邊不同的人,或者去感動一啲本身支持呢條條例嘅人,去再次企出嚟試吓去挽回劣勢。」
「可能香港人喺溫水入面,覺得游緊無問題,但其實我覺得盤水已經係好熱。香港人如果真係關心自己,甚至想保護屋企人,其實今次真係需要企出嚟,去話畀政府聽,我哋唔認同(修例)。即使13萬人你(政府)唔理,但如果有100萬人出嚟,企喺你面前,其實你無可能忽視呢個力量!所以我相信要集齊每一個香港人的力量,去挽救自己嘅屋企。」
日期:6月9日(日)
集合地點:維園草地
時間:下午2時30分集合、3時正起步
遊行路線:維園草地遊行至金鐘添美道立法會
(資料來源:民陣)
-----------------------------
新聞有價 你肯為《蘋果動新聞》付幾多錢?
https://hk.adai.ly/QDTT6y5mgX
網名「在沉默中爆發」的「連登仔」Alvin,為反對「送中」惡法自發上街派傳單。朱永倫攝
「連登仔」Alvin希望透過傳單,令香港年輕人更清楚送中惡法對香港帶來的影響。朱永倫攝
網名「在沉默中爆發」的「連登仔」Alvin,為反對「送中」惡法自發上街派傳單。朱永倫攝
連登仔派發的「反送中」傳單,都是由連登仔夾錢印製而成。朱永倫攝
網名「在沉默中爆發」的Alvin,早前在連登分享與網友派傳單的相片和帖文後,即獲逾萬名連登仔讚好力撐。朱永倫攝