利物浦隊長謝拉特屋企近日傳來陣陣鼻鼾聲，搞到默西賽德郡居民失眠情況加劇；因為居民一直因賊佬作惡冇覺好瞓，加埋謝拉特一家「Zzzzz」，你話有乜理由會瞓得着？究竟佢出咩計仔消災解難呢？

特種部隊24小時昅實

原來謝拉特最近請咗一隊前特種部隊嚟做「實Q」，24小時昅實自己間豪宅，於是成家人可以安心大瞓特瞓囉！呢班軍佬係嚟自有英軍皇牌部隊之稱嘅SAS（空中特勤隊），個個戴住「WhoDaresWins（敢博先會贏）」徽章，你話等閒賊佬點敢攞條命仔嚟博？
謝拉特一位老友話畀我求大俠知，自從去年12月11日歐聯作客馬賽當日，發生4名賊佬潛入其450萬鎊（約7,100萬港元）豪宅，恐嚇老婆雅麗絲同掠走大批財物後，謝拉特已經激到生蝦咁跳；為保老婆同兩名囡囡嘅人身安全，謝拉特請來一隊前SAS軍人作鎮宅之寶！
我求大俠都好贊成對付賊佬要採取強硬手段，但同區好多利物浦同愛華頓球員好可能要遭殃，因為啲賊容乜易捨難取易上門光顧？除非佢哋跟風請埋特種部隊坐鎮，冇咁多錢嘅咪請啹喀兵頂住檔囉，唔知呢排英軍流失率會唔會零舍高啲呢？

紅軍7球員被「爆格」

話說回頭，利物浦市豪宅區治安咁差，近兩年紅軍就有7名球員被「爆格」，會方已經諗緊辦法喺客場比賽嗰陣保護球員啲大屋。我求大俠就建議紅軍1月簽人嗰陣，合約最好寫明附送1隊SAS軍人，唔係都好難有球星願意加盟喇！