賭王千金何超蓮、琦琦、馬詩慧同倪晨曦等，今日齊集銅鑼灣出席Lancome活動，藉著下星期嘅三八婦女節，各人同自己嘅閨中密友一齊參與活動，分享佢哋嘅故事。

超蓮孖生細佬猷啟同大陸女友GiGi宣佈訂婚，超蓮話一家人都好開心：「恭喜晒！係開心事，祝福佢。可以逗佢利是好開心！」

不過，原來超蓮到依家都唔清楚GiGi做咩工作，只係覺得對方好高，仲話之後先至深入了解對方喎。

介唔介意畀細佬爬頭？超蓮話：「唔會，我哋喺屋企都有傾過邊個最快結婚，都覺得係佢。依家女仔都係遲婚，我同家姐都唔會咁早。」提到前度吳克群有新戀情（新聞連結： http://bit.ly/2F3EDXR )，超蓮就大方祝福，仲話好替對方開心，但自己就唔心急拍拖。

最後超蓮就爆自己今年有大計，就係下個月頭佢會開一間牛肉麵店，今次用咗百萬投資，攞咗個世界經營權，仲請埋台灣嘅師傅嚟香港，佢仲話目標係喺世界開超過100間店，仲想做到上市！超蓮話：「間舖喺銅鑼灣，做埋宵夜時段，我會日日喺舖㗎，到時搵我影相都冇任歡迎。」

精選娛聞，喺晒《娛果》
http://fb.com/appledailyent